Yaz mövsümündə təbiətdə bol olan zəncirotu çiçəkləri yalnız gözəlliyi ilə deyil, həm də mətbəxdə istifadəsi ilə diqqət çəkir. Bu bitkidən hazırlanan mürəbbə həm dadı, həm də aroması ilə fərqlənir.
Foodinfo.az xarici mediaya istinadla xəbər verir ki, zəncirotu mürəbbəsi hazırlamaq üçün təxminən 100–120 ədəd çiçək toplanmalı, yaxşıca yuyulmalı və acılığın aradan qaldırılması üçün qaynar su ilə qısa müddət işlənməlidir. Daha sonra çiçəklər şəkər siropunda zəif odda bişirilərək xüsusi dad əldə edilir.
Mütəxəssislər bildirirlər ki, bu mürəbbə C vitamini və antioksidantlarla zəngindir, bu isə immun sisteminin güclənməsinə dəstək verir. Nanə əlavə edildikdə isə mürəbbəyə təravətli və fərqli bir dad qatılır.
Zəncirotu mürəbbəsi nanə ilə
Tərkibi:
- zəncirotu çiçəkləri — 100–120 ədəd
- şəkər — 500 q
- su — 500 ml
- yarım limon
- nanə — 20 q
Hazırlanma qaydası:
- Yuyulmuş çiçəkləri və nanə yarpaqlarını qazana əlavə edib üzərinə su tökün, qaynadın və zəif odda qapaq altında 1 saat bişirin.
- Alınan qarışığı süzərək mayeni ayırın.
- Mayeyə şəkər əlavə edib qarışdırın və yenidən qaynadın, sonra zəif odda təxminən 30 dəqiqə bişirin.
- Doğranmış limonu əlavə edib daha 10 dəqiqə bişirməyə davam edin.
- Hazır mürəbbəni steril bankalara tökərək qapağını bağlayın.
Bu qeyri-adi mürəbbə səhər süfrələri və çay saatları üçün maraqlı və faydalı seçim ola bilər.
