Qax rayonu ərazisində kənd təsərrüfatı üçün təhlükəli zərərverici hesab edilən qəhvəyi mərmər bağacığının aşkar edilməsi və yayılma təhlükəsinin aradan qaldırılması məqsədilə Kənd Təsərrüfatı Nazirliyi yanında Aqrar Xidmətlər Agentliyinin Bitki Mühafizəsi və Fumiqasiya (zərərsizləşdirmə) Mərkəzinin Qax rayon Mərkəzi tərəfindən kompleks mübarizə tədbirləri davam etdirilir.
Qax rayon Mərkəzinin rəisi Hikmət Hafizov AZƏRTAC-ın bölgə müxbirinə bildirib ki, sentyabrın üçüncü ongünlüyü, oktyabrın əvvəllərindən etibarən havanın temperaturunun 15 dərəcədən aşağı düşməsi səbəbindən rayon ərazisində qəhvəyi mərmər bağacıqlarının qışlama yerlərinə miqrasiyası müşahidə edilib. Bununla əlaqədar mərkəz tərəfindən “Axtar, tap, məhv et” kampaniyası çərçivəsində zərərvericinin qışlama yerlərinin monitorinqlərinə start verilib, qəhvəyi mərmər bağacığına qarşı mexaniki, eyni zamanda, kimyəvi mübarizə tədbirlərinə başlanılıb. Monitorinqlər nəticəsində Şotavar kəndində tikinti materiallarının satışı mağazası və ətraf ərazidə, Zəyəm kəndində şadlıq evi, fındıq emalı sexi və yardımçı binalarda, fermer Hüseyn Tarverdiyevə məxsus meyvə bağındakı köməkçi binalarda, Tasmalı kəndində kənd təsərrüfatı texnikalarının ehtiyat hissələrinin satışı mağazası və ətraf ərazilərdə qəhvəyi mərmər bağacığının kütləvi toplaşması müşahidə edildiyindən həmin ərazilərdə dövlət hesabına verilmiş Shaolin (Alpha cypermethrin) insektisidi ilə dərmanlama tədbirləri həyata keçirilib və zərərverici kütləvi şəkildə məhv edilib.
Qurumun rəsmisinin məlumatına görə, mərkəzin mütəxəssisləri tərəfindən “Axtar, tap, məhv et” kampaniyası çərçivəsində yaşayış yerlərində, inzibati və köməkçi binalarda, ictimai iaşə obyektlərində noyabrın 28-dək aparılmış monitorinqlər zamanı Zəyəm, Tasmalı və Əlibəyli kəndlərində ümumilikdə 883 nöqtəyə baxış keçirilib, nəticədə 472 nöqtədə 49 min 400 ədəddən çox qəhvəyi mərmər bağacığı aşkar edilərək mexaniki yolla məhv edilib.
“Mərkəzin mütəxəssislərinin və yerli icra nümayəndələrinin iştirakı ilə aparılan monitorinq və maarifləndirmə tədbirləri rayonun bütün kəndlərini əhatə edir və əhaliyə təhlükəli zərərverici ilə qışlama dövründə mexaniki yolla mübarizə aparılmasının vacibliyi izah edilir”, - deyə Hikmət Hafizov bildirib.
