Heyvan mənşəli zülallar sağlam qidalanmanın əsas hissəsi hesab olunur və onlardan gündəlik rasionda balanslı şəkildə istifadə etmək tövsiyə edilir. 

Foodinfo.az xəbər verir ki, bu zülallar insan orqanizmi tərəfindən sintez olunmayan bütün vacib amin turşularını özündə cəmlədiyi üçün “tam zülal mənbəyi” hesab olunur.

Ət və quş əti məhsulları – mal, qoyun, dana, toyuq və hinduşka ətləri — əzələlərin qurulması, toxumaların bərpası və immun sisteminin gücləndirilməsi üçün əhəmiyyətli rol oynayır.

Bununla yanaşı, balıq və dəniz məhsulları da yüksək keyfiyyətli zülal mənbəyi kimi diqqət çəkir. Omega-3 yağ turşularının bol olduğu somon, tuna və skumbriya həm ürək-damar sağlamlığını qoruyur, həm də beyin fəaliyyətini dəstəkləyir.

Həmçinin yumurta ən qiymətli zülal mənbələrindən biridir və həm uşaqların inkişafında, həm də böyüklərin gündəlik enerji tələbatının ödənməsində mühüm rol oynayır.

Zülal baxımından zəngin olan digər qida qrupu isə süd və süd məhsullarıdır. Süd, qatıq, pendir və kəsmik həm kalsiumla zəngindir, həm də orqanizmin zülal ehtiyacını qarşılayır.

Heyvan mənşəli zülallar düzgün porsiya ilə istehlak edildikdə sağlamlıq üçün böyük fayda verir. Lakin ürək, xolesterin və bəzi metabolik xəstəlikləri olan şəxslər qırmızı ət istehlakını həkimlə məsləhətləşərək tənzimləməlidirlər.