Qida Təhlükəsizliyi Agentliyinin əməkdaşları Şəhidlər Xiyabanını ziyarət edib

Azərbaycan xalqı hər il 20 Yanvar faciəsi qurbanlarının xatirəsini dərin ehtiramla yad edir

Azərbaycan Respublikası Qida Təhlükəsizliyi Agentliyinin sədri Qoşqar Təhməzlinin rəhbərliyi ilə agentliyin əməkdaşları Ümumxalq Hüzn gününün 28-ci il dönümü münasibəti ilə Şəhidlər xiyabanını ziyarət ediblər.

Bu barədə Foodinfo.az-a Agentliyin Kommunikasiya və İnformasiya Texnologiyaları şöbəsindən məlumat verilib.

28 il əvvəl xalqının azadlığını, şərəf və ləyaqətini hər şeydən uca tutan vətənpərvər Azərbaycan övladları həmin müdhiş gecədə canlarından keçərək şəhidlik zirvəsinə  ucalıblar.

Agentliyin əməkdaşları Şəhidlərimizin əziz xatirəsinə ucaldılmış Əbədi məşəlin önünə, şəhid məzarlarına gül dəstələri qoyub.

Sovet qoşunlarının Azərbaycanda törətdiyi qanlı qırğından uzun illər keçməsinə baxmayaraq, xalqımız o dəhşətli günlərin ağrı-acısını unutmur. Azərbaycan xalqı hər il 20 Yanvar faciəsi qurbanlarının xatirəsini dərin ehtiramla yad edir.

Allah rəhmət eləsin!

Foodinfo.az